أغلى ٥ أنواع آيس كريم في العالم الصيف دخل ومحدش بقى طايق نفسه وكلنا محتاجين آيس كريم يهون علينا الحر ده وعلشان تعرف إني بعزك وما يهونش عليا التلزيق اللي انت عايش فيه .. فجيتلك النهارده ومعايا أغلى 5 أنواع آيس كريم في العالم تمن بولة منهم تغنيك عن الشغل طول حياتك حسب تقرير صدر من موقع wealthy gorilla ذكر الموقع أغلى 5 أنواع آيس كريم في العالم أرخص واحد فيهم يخليك من أثرياء القوم وعلشان ما تتخضش فهنبدأ بصاحب المركز الخامس والأرخص بين القايمة دي كلها .. وهو three twins ice cream sundae واللي سعره 3333 دولار بس واتصنع النوع ده لأول مرة سنة 2005 وبيتكون من آيس كريم عادي خالص بس متغطي بالنبيذ النادر وبيتقدم مع معلقة دهب من فترة الخمسينات في القرن ال 19 ومش عارفين اللي هيشتري الآيس كريم هياخد المعلقة معاه ولا هو مجرد انه هينال شرف أكل الآيس كريم بيها وخلاص لكن اللي نعرفه إنك ممكن تستغنى عنه وتشتري بالمبلغ ده عربية صغيرة ترحمك من زحمة المواصلات وتملى شنطتها آيس كريم كمان في المركز الرابع بقى جه آيس كريم فروزين هوت شوكليت واللي سعره 25 ألف دولار واللي صدر لأول مرة سنة 2007 وده بيتكون من أوراق الدهب وبيتقدم مع سوار ذهبي عيار 18 وواحد قيراط من الألماس الأبيض وبرضه بيتقدم معاه معلقة دهب مزينة بالالماس .. ومش فاهم الحقيقة ليه واحد ممكن يصرف تحويشة عمره في الغربة في بولة آيس كريم ؟ إلا لو كان حران قوي يعني في المركز الثالث جه آيس كريم three twins ice cream لـ Absurdity sundae واللي سعره 60 ألف دولار وبيتم تقديمه مع تذكرة طيران .. وبتعود أرباحه لصالح الجمعيات الخيرية في أفريقيا للحفاظ على البيئة واللي من ناحيتهم قالوا ، والنعمة ما شوفنا حاجة يا باشا المشكلة هنا لو انت عندك فوبيا من الطيران فإيه مصير تذكرة الطيران دي اللي دفعت فيها 60 ألف دولار ؟ في المركز الثاني بقى جه MrBeast’s ice cream sundae واللي سعره 100 ألف دولار ، واللي ممكن تشتري بيه لاعب كرة قدم تفرهده في الملعب لمدة سنتين والآيس كريم ده اتعمل بناءًا على طلب يوتيوبر مشهور اسمه چيمي دونالدسون .. واللي طلب من شيف انه يعمله آيس كريم مكون من جبنة ب 500 دولار وشرايح لحمة ب 50 ألف دولار وكرات آيس كريم بقيمة 100 دولار وشيكولاته من أمريكا الجنوبية وفراولة من اليابان وتوت بري مش عارف منين .. والخشب من دمياط ودفع للشيف بقشيش ٢٠ ألف دولار .. لا الصرف باين وصلنا للمركز الأول ، فلو انت ضغطك عالي حاول تمسك أعصابك لأن تمن الآيس كريم ده ممكن تشتري بيه قصر تعيش فيه باشا حتى لو زمن البشوات انتهى .. وده آيس كريم فراولة آرنو واللي سعره مليون و٤٠٠ ألف دولار وهو آيس كريم عادي خالص .. بس بيتقدم مع خاتم ألماس وردي عيار ٤,٧ قيراط كان مملوك للسير إرنست كاسيل طب لو الخاتم ماجاش مقاسك هتعمل ايه في المصيبة دي ؟ وزي ما انتوا عارفين المثل المصري اللي بيقول اللي معاه قرش محيره يجيب حمام ويطيره أو بولة آيس كريم .. سعرها كفيل يجوز شباب حي كامل ويشتريلهم تكاتك يكلوا عليها عيش بعد ما سمعت عن أغلى أنواع الآيس كريم في العالم تقدر تقولنا في الكومنتات ايه هي أغلى حاجة اشتريتها في حياتك وما تنساش وانت قاعد حران كده تاخدلك لفة في الحلقات اللي فاتت هتنبسط ..