سفـاح الجيزة| إبليس وعامل فيها مولانا - تحقيقات مثيرة لأحداث هـزت الرأي العـام

سفـاح الجيزة| إبليس وعامل فيها مولانا – تحقيقات مثيرة لأحداث هـزت الرأي العـام

37 Views

بار بوالدته ، طباخ شاطر بشوش ، بيعمل خير ، وما بياكلش حق حد صفات تتمناها كل بنت في فارس احلامها لكنه مع الصفات الحميدة دي كلها واللي كل معارفه كانوا يشهدوا بيها إلا إنه ولمدة 5 سنين مارس عدد كبير من الجرايم بين القتل والنصب والإحتيال والسرقة وإنتحال شخصيات وبعد ما أنهى حياة مراته وأختها وصاحب عمره وضحية رابعة من ضحاياه بيقع بسبب خطأ بسيط جدًا ، واتحولت قصته لمسلسل هز الوطن العربي كله ، بعنوان سفاح الجيزة مين سفاح الجيزة ؟ وإزاي أنهى حياة ضحاياه ؟ وإزاي تخفى في عدد كبير من الشخصيات ؟ وليه صناع مسلسل سفاح الجيزة معرضين للمسائلة القانونية ؟ قذافي فراج عبد العاطي ، من مواليد محافظة الجيزة واللي بتبدأ قصته لما قرر يتجه للعمل في مجال العقارات بس مش بفلوسه هو شخصيًا ، لا ده كان بيتاجر وبيبيع ويشتري بتوكيل رسمي من صاحب عمره اللي عايش في السعودية المهندس رضا محمد ، واللي إتعود إنه يبعت مدخراته لقذافي علشان يستثمرها معاه في العقارات ولكن بعد سنة من شراكتهم بيحس المهندس رضا بعدم جدية قذافي ، فبيقرر إنه ينزل مصر سنة 2015 علشان يطمن على العقارات اللي قذافي إشتراها بإسمه بالفعل نزل المهندس رضا مصر ، وماكانش قدام قذافي غير إنه يعمل معاه الواجب .. فدعاه لواحدة من الشقق اللي إشتراها قذافي بإسمه في منطقة بولاق الدكرور وكان مجهزله عشوة حلوة ، علشان يقعدوا يتعشوا ويتحاسبوا بالمرة ولكن بعد دقايق حس رضا بألم رهيب في معدته بسبب إن قذافي صاحب عمره والسبب في العز اللي هو فيه ده حطله سم في الأكل ، وكان مجهز حفرة عمقها مترين في الشقة نفسها وبعد ما ضربه على دماغه بحديدة علشان يتأكد إنه خلاص مات دفنه فيها وبعت رسالة لأهل رضا من تليفونه بيقول فيها إنه إتمسك تحري وهو ماشي جنب مظاهرة ومش عارف اللي قبضوا عليه هيودوه فين ولما يعرف يتواصل معاهم هيكلمهم بنفسه وهنا طبعًا ، أهله بطلوا يدوروا عليه بس الحقيقة بقى إن دي ما كانتش أول جريمة يعملها قذافي لأنه قبل الحدث ده بسنة واحدة إتجوز بنت زوجته الأولى ، فاطمة زكريا واللي إتجوزها بالعند في أختها اللي كان على علاقة بيها وعرض عليها الجواز بس هي رفضته وبعد جوازه بأختها فاطمة ، بدأت حبيبته الأولانية ، أخت مراته تهدده بأنها هتفضح حقيقته وحقيقة علاقتهم لأختها فاطمة هنا حس قذافي بالخطر من ناحيتها وقرر إنه يخلص منها بس بطريقة تخليه بعيد عن كل الشبهات قذافي كان عارف إن أخت مراته بتحب التمثيل ونفسها تتشهر ، فبيستعين بكومبارس وبيديله فلوس علشان يعمل دور منتج من دولة عربية وبيقابل أخت مراته وأهلها وبيقنعهم إنها تسافر علشان تشارك في عمل فني جديد وبالفعل أهلها بيقتنعوا وبيسيبوها تسافر ولكن بعد ساعات من سفرها ولمدة أسبوعين كانت طريقة التواصل بينهم عبارة عن شوية رسايل مش أكتر كانت بتتحجج فيهم إنها يا تعبانة يا مشغولة ومش عارفة تكلمهم لحد ما انقطعت أخبارها مع الوقت ، لأنها في الوقت ده كانت مقتولة بعد الحادث ده بمدة بسيطة بتكتشف فاطمة مراته إن جوزها بيمتلك عدد كبير من البطاقات الشخصية بأسماء مختلفة غير الإسم اللي هي تعرفه بيه وبالتالي ماكانش قدامها غير إنها تطلب منه الطلاق وتهدده إنها هتفضحه ، فطبعًا قرر قذاقي إنه يخلص منها وكالعادة عمل العشوة التمام بس زود في الأكل السم شوية وبعد ما ماتت قطعها وحطها في الفريزر وبعدين نقلها للشقة اللي مدفون فيها المهندس رضا في بولاق الدكرور ، ودفنها جنبه هنا أهل فاطمة شكوا في قذافي إنه ورا إختفاء بناتهم الاتنين فقدموا فيه بلاغ ، ولكن كانت الأدلة ضده ضعيفة جدًا ومحدش أثبت عليه التهم دي وساعتها رفع قضية على مراته إنها سرقت فلوسه وهربت كمان سنة 2017 بيعمل قذافي خطوة هتغير من مسار الأحداث وهتخليه ينقل إجباري محل إقامته ويتخلص من هويته الحقيقية لما قرر يبيبع ممتلكات صاحبه المهندس رضا بموجب التوكيلات اللي عملهاله صاحبه وده اللي خلى محامي المهندس رضا يتهمه بأنه السبب في إختفاءه فقرر قذافي وقتها إنه يسيب محافظة الجيزة وينقل إسكندرية ، ويعيش هناك بإسم رضا محمد صاحبه اللي قتله ، وبالفعل بيستقر قذافي في منطقة العصافرة وبيبدأ يتاجر في الأجهزة الكهربائية وفي الوقت ده إتعرف على بنت ووقعها في حبه ، وأقنعها إنها تستثمر فلوسها معاه في الأجهزة الكهربائية ، ما هي كلها مكسب ولكن بعد كام شهر بتكتشف البنت إنه نصب عليها لأنه ما نفذش أي وعد من وعوده ليها فتطلب فلوسها ، وبيقنعها إنها تاخد مكانها بضاعة وبالفعل بتوافق وبتروح تقابله في مخزن الاجهزة الكهربائية في العصافرة ولكنها بتتفاجئ إنه بيقتلها وبيدفنها مكانها في المخزن طبعًا أهل البنت حاولوا بكل الطرق يوصلولها بس ما كانش فيه دليل واحد على علاقته بيها بيكمل قذافي حياته في إسكندرية بإسم المهندس رضا وبيبدأ حياة جديدة تمامًا ، وبيتجوز بنت من عيلة غنية جدًا إسمها نهى ، واللي بعد أقل من سنة بتقرر الإنفصال عنه بسبب غياباته المتكررة ، وتصرفاته الغريبة ولكن الموضوع ده جرح كرامته فبيقرر يراقبها هي وبيتها ولحد ما لقى فرصة قدامه البيت فاضي فيها بيدخل قذافي البيت وهو لابس نقاب وبيسرق كل اللي فيه من فلوس ودهب طبعًا أهل طليقته بيتهموه بالسرقة ، ولكن برضه مفيش اي دليل قوي ناحيته #سفاح_الجيزة