عارف لما تكون مضايق وعايز تفك عن نفسك فتقرر تروح ستارباكس تشرب حاجة ولا تشتري شيكولاتاية تخفف أحزانك ؟ بتحصل كتير ، مش غريبة يعني بس الغريب بقى لما تلاقي علامة ضفدع قد كده على ورقة الشيكولاته ولا على كوباية ستار باكس .. طبعًا ساعتها مش بس هتتخض ، ده انت بطنك هتوجعك كمان أهوه ده اللي حصلي بالظبط ، معقول ممكن تكون المنتجات دي بتستخدم الضفادع في مكوناتها ؟ مسكت موبايلي وسألت جوجل ، إيه يا عم جوجل الكلام ده ؟ إيه علامة الضفدع اللي ع الورقة دي ؟ هوب .. لاقيت في وشي سيل من البوستات و الفيديوهات وكلها بصيغة خبر عاجل .. وبيتقال فيهم إن كتير من شركات الصناعات الغذائية بدأت تدخل في منتجاتها بروتين حشرات وإنه له دور أساسي في تأمين الغذاء للبشرية في المستقبل آه يا بطني .. يعني أنا كلت شيكولاته بالضفادع دلوقت ؟ الغريبة بقى وأنا ماسك موبايلي إكتشفت إني متصور بعلامة الضفدع دي في كل حتة ، وأنا باكل Kitkat ، وأنا ماسكة كوباية النسكافيه بتاعت StarBucks أو Costa cafe وغيرها كتير ده أنا كلت وشربت حاجات بالضفادع تكفيني لسنين لكن كل الكلام ده ما دخلش دماغي ، وقررت أسأل حد ثقة هيئة الغذاء والدواء العالمية ، واللي قالت على موقعها الرسمي إن علامة الضفدع اللي موجودة على المنتجات معناها إن الشركة صاحبة المنتج ده بتتبع المعايير والقواعد الدولية الخاصة بالإنتاج المستدام ، وإن المنتجات دي اتزرعت و اتصنعت بطرق صديقة للبيئة .. إيه ده يعني الضفدع طلع تمام ؟ بالظبط كده .. فأنا من مكاني هذا أحب أقولك كُل وانبسط وما تصدقش أي حاجة تشوفها