طول عمرنا نعرف إن الأخطاء دي حاجة مش كويسة حتى باين من إسمها ، أخطاء ودي يا إما بتحصل بالصدفة أو بسبب الإهمال أو حتى بفعل فاعل ، لكن أيًا كان سبب حدوثها فهي حاجة مش تمام .. لكن إحنا طلعنا غلطانين لأن في حالات نادرة بتكون الأخطاء دي حاجة لذيذة قوي نتمنى إنها تحصلنا ، ومش مرة واحدة ، لا تتكرر معانا كمان ولسان حالنا بيقول ، دعونا ننسى أخطاء الماضي ونصنع أخطاء جديدة وخصوصًا لو كانت الأخطاء دي زي الخطأ اللي حصل مع موظف هنغاري من مقاطعة (سوموجي) ، واللي جه يسحب راتبه في نهاية شهر 7 اللي فات ده وكعادة كل شهر ، علشان يتفاجئ إنه عن طريق غلطة في النظام المحاسبي للشركة اللي بيشتغل فيها راتبه تضاعف 388 مرة فعلى حسب موقع HVG الهنجاري ، إن موظف في إحدى الشركات اللي تم التكتم على إسمها قدم للشركة رقم حسابه البنكي علشان يتم تحويل راتبه عليه كل شهر ، ولكن موظف الحساب بدل ما يختار تحويل راتب الموظف المحظوظ ده بالعملة المحلية (الفورنت) ، عملة هنغاريا حول راتبه باليورو ، وبعد ما كان المفروض راتبه 92549 فورنت ، أو ما يعادل 238 يورو إكتشف إن الشركة بعتت على حسابه 92549 يورو يعني ما يعادل راتب 32 سنة كاملين طبعًا الموظف ما صدقش نفسه ، وقال إنه إستحالة يكون شاف الرقم ده صح وعلشان يتأكد بنفسه ماكانش قدامه غير طريقة واحدة بس إنه يسحب الفلوس دي من أقرب ATM وبالفعل اتجه الموظف لأقرب ماكينة صراف آلي وجرب يسحب ، لقى المكنة بتطلع قماش وسحب 15500 يورو ، لكن يا خسارة يا فرحة ما تمت ، وخلال ساعات قليلة بتكتشف الشركة المصيبة اللي حصلت دي وبتطلب من الموظف إنه يرجع الفلوس اللي أخدها ولكنه بيتحجج إنه مش عارف يسحب الفلوس أبدًا فماكانش قدامهم حل غير إنهم يبلغوا الشرطة اللي عرفت بعد شوية بحث إنه سحب بالفعل مبلغ ال 15500 من ماكينة سحب آلي في جنوب هنغاريا وبعد محاولات من الشرطة مع الموظف بالترهيب أحيانًا والترغيب أحيان أخرى ما قدروش ياخدوا منه لا حق ولا باطل لأنه مدرك 100% ، إن موقفه القانوني سليم وإنه لا يقع بأي شكل من الأشكال تحت طائلة القانون فقرروا هنا يلجؤوا للمدعي العام في منطقة (كابوسفار) في جنوب غرب هنغاريا ، وبمساعدة المدعي العام وبعض السلطات في البلاد ، قدرت الحكومة تجمد حساب الموظف البنكي ، ويرجعوا للشركة مبلغ 72000 يورو ، وبعد ما رجعوا الفلوس للشركة كانت أول قراراتهم رفد الموظف ده ووصفوه بعدم الأمانة ووصوا في أماكن كتير بعدم تشغيله أبدًا ، أو ممكن يكون هو اللي إستقال من نفسه لأنه معدش لازمه ، فالمبلغ اللي سحبه ال 15500 يورو يعادل راتبه لمدة 5 سنين ونص كان هيضطر يشتغلهم كلهم ، فقرر ياخد أجازة مفتوحة ياااه .. أهي دي الأخطاء اللي تفتح النفس بصحيح وتخلي مقبل على الحياة بقلب جامد تشتغل كام سنة ، وتريح كام سنة .. وربنا يخليلنا الحسابات