عارف لما تصحى من النوم تلاقي كل حاجة في حياتك اتمسحت كل ذكرياتك ، أهلك ، صحابك حتى إسمك نفسه اللي فضلت شايله لسنين سنك اللي عديته يوم بيوم وساعة بساعة مهنتك اللي فضلت تشتغلها وتطورها لسنين وبعد ما كنت زعيم في مجالك ، وبينضرب بيك المثل تلاقي نفسك مش فاكر نفسك ده اللي حصل لناس كتير ، زي الممثل المشهور روبين ويليامز أو الرئيس الأمريكي رونالد ريجان أو الممثل المصري عمر الشريف وغيرهم كتير ، صحيوا فجأة لقوا نفسهم مش فاكرين نفسهم وأصابهم مرض آلزهايمر سنة 1901 اتحجزت مريضة في مركز فرانكفورت إسمها (أوجسته ديتر) واللي كان عمرها في الوقت ده 51 سنة كانت أوجسته بتعاني من بعض الأعراض السلوكية الغريبة زي فقدان الذاكرة قصيرة المدى وبعض الهواجس والخيالات إن فيه حد بيهددها بالقتل وبعض عدد كبير من الفحوصات ومدة طويلة من المتابعة إكتشفوا إن أوجسته ما عندهاش أي مرض نفسي يوصلها للحالة دي وإعتبروا إن الأعراض دي غريبة شوية في الوقت ده كانت الطبيب المشرف على حالة أوجسته طبيب ألماني إسمه (ألويس ألتسهايمر) واللي شغله جدًا حالة أوجسته ، وقرر يدرسها بتعمق أكتر لأنه حس إن دراسة الحالة دي هيكون وراها إكتشاف كبير ولكن للأسف بعد كام شهر من حجز أوجسته في مركز فرانكفورت كان لازم تخرج من المستشفى بسبب غلاء تكاليفه وهنا حس دكتور (ألتسهايمر) إن حلمه في إكتشاف ودراسة الحالة دي بينهار فقرر يتكلف بعلاجها طول فترة حياتها في صفقة تبادلية بسيطة ، هيقدملها العلاج والرعاية الكاملة في مركز فرانكفورت مقابل سجلاتها المرضية ، ودماغها .. ده بعد وفاتها طبعًا واللي ما طولتش كتير ، لأن في أبريل سنة 1906 ماتت أوجسته ، وتم إحضار سجلاتها الطبية ودماغها لمدينة ميونخ ، علشان يشتغل عليها ويدرسها بدقة دكتور ألتسهايمر ، بمساعدة عدد من الأطباء الإيطاليين واللي إكتشفوا بعد البحث والدراسة تشوهات دماغية في مخ أوجسته هي اللي سببت اللي حصلها ده ، واللي كان سبب في وفاتها مرض آلزهايمر ومرض آلزهايمر مرض تحللي عصبي ومعنى كلمة مرض تحللي ، إنه مرض بيسبب فقدان تدريجي لوظيفة معينة لحد ما تختفي تمامًا مرض بيبدأ ببطء شديد ، وبطريقة غير متوقعة بيكبر وبيتشرس ، وبيسيطر على المريض تمامًا لحد ما يخلص عليه ومرض آلزهايمر بيبدأ عادة بصعوبة في تذكر الأحداث الأخيرة واللي بيعرفها العلماء بالذاكرة قصيرة المدى أو الذاكرة الأولية النشطة ، وهي قدرة البني آدم على الإحتفاظ بآخر قدر من المعلومات في حالة نشطة ذكريات حديثة حصلت في آخر كام ساعة أو في آخر كام يوم ، تقدر الدماغ تستدعيها بسهولة ومع تقدم حالة المرض ، بتظهر على المريض أعراض أصعب بكتير زي مشاكل اللغة وإنه يفقد الترابط اللغوي بين كلامه والتوهان ، واللي العلماء بيعرفوه إنه عكس التوجه والتوجه ده وظيفة من وظائف العقل بتخلي الشخص مدرك الزمان والموقع الجغرافي وكينونته يعني حالة التوهان اللي بيسببها آلزهايمر دي معناها إنه ما يبقاش عارف إحنا إمتى وفين وهو مين ، وجه هنا إزاي ومع تطور المرض بيسبب الزهايمر ضعف فيما يسمى بالدافع والدافع معناه الشعور بالرغبة أو النفور يعني بتخليه في حالة بين إنه مش عارف عايز إيه أو إنه مش مدرك إنه لازم يتجنب حاجة معينة أو يهرب من خطر ما ، لذلك تم رصد عدد كبير من مرضى الزهايمر ماتوا بسبب إيه بقى حوادث السير ، لأنهم وصلوا لمرحلة مش مدركين الخطر وفي نفس الوقت بيتخيلوا أخطار تانية مش موجودة من الأساس ده غير عدم القدرة على الإهتمام والعناية بالنفس والنظافة الشخصية ومشاكل سلوكية كتير جدًا جدًا ومع زيادة سوء حالة المريض ، بيكون قادر ياخد قرار واحد بس وهو الإنسحاب من بيئته وبرضه هتلاقي إنه تم رصد أعداد كبيرة من مرضى الزهايمر في أماكن بعيدة جدًا عن مساكنهم لأنهم خرجوا لرغبة منهم البعد عن البيئة الصحاب والعيلة اللي إعتاد عليهم طول عمره وتدريجيًا يؤدي الزهايمر لفقد المريض لوظايفه الجسدية ، ثم الوفاة في ظرف من 3 لـ 9 سنين من تاريخ إصابته بالمرض اللي للأٍسف ما بيكونش هو شخصيًا قادر على تمييزه بدقة الزهايمر بيصيب 55 مليون بني آدم في السنة وكل سنة بيصاب بيه أكتر من 10 مليون حالة وبيموت بسببه 2 مليون بني آدم كل سنة كلهم ما بيكونوش عارفين إنهم مصابين بحاجة ولا مدركين حالتهم كويس ، ولا عارفين هما مين أصلاً وبمناسبة اليوم العالمي لـ آلزهايمر 21\8 حبينا نفكركم بالمعاناة اللي ممكن يعيشها مريض آلزهايمر وهو مش عارف ولا فاهم إنه لازم يشتكي ، واللي حواليه بيعاملوه على أساس إنه كبر وخرف .. آلزهايمر ملوش أسباب معروفة بالظبط وبعد التطور العلمي الرهيب ده كله إلا إن كل الأسباب اللي بتؤدي للزهايمر هي مجرد محفزات على زيادته زي الإكتئاب ، والوراثة ، وإصابات الرأس لكن سببه الحقيقي محدش لسه إكتشفه .. مرضى آلزهايمر بيعانوا حول العالم ، ولأنهم مش فاكرين نفسهم حبينا نفتكرهم بحلقة ..