” العالم بقى مخيف – أغرب الإختراعات في العالم لو فاكر إنك تعرف كل حاجة تبقى غلطان لأن فيه شوية إختراعات فريش هيخلوك حاسس اننا رايحين لحتة بعيدة قوي .. تيجي معانا ؟! وأولهم ، حلم الطفولة .. مسدس لصيد الحشرات أو Bug i salt وده مسدس تصطاد بيه زي ما تحب من حشرات ، جات معاك في زواحف ؟ .. ودي يا معلم وده عن طريق طلقات قد حباية الرز كده بس مشكلته إنه بيصطاد من مسافة 3 قدم يعني ما حصلش متر .. وده هيحتاج جرأة كبيرة منك لأنك هتقرب م الصرصار أكتر .. خد بالك ده بيطير بس مع شوية تدريب هتكون حريف .. تاني إختراع ده بقى ، هيخليك تضرب كف بكف وتقول هي الدنيا جرى فيها إيه ؟ أنا هقولك جرى فيها إيه .. دلوقت بقى فيه عربية بتتزرع أنا عارف إنك مش مصدق ومش مستوعب أصلًا .. ده اللي هو إزاي ؟ شركة مرسيدس أعلنت في معرض لوس أنجلوس في 2010 إنها بتطور تقنية إسمها السيارة الحيوية ودي تجربة بيطبقوها على عربية إسمها بيوم واللي كانت في الأساس بذرتين .. بذور عربيات ؟! .. شفت ازاي ؟ وإن العربية دي (بتنمووووو) في بيئة عضوية يعني في تربة عادية خالص .. بس بظروف خاصة وخد بالك الكلام في ٢٠١٠ يعني زمانها كبرت وترعرت دلوقت .. وبقت عربية قد الدنيا .. ما تبقاش تتريق تاني بقى على الناس اللي فاكرين المكرونة بتتزرع لأن ما بقاش فيه حاجة مضمونة .. تالت إختراع ده بقى على قد ما هو حزين بس مهم وخصوصاً لاخواتنا السناجل .. وبالذات لو الدنيا جاية عليهم مخدة Hug me أو إحضنني .. مش أنا يا عم انت .. هي المخدة اللي اسمها كده ما توديناش في داهية إحنا هنا كمصريين ممكن نسميها ايه علشان نبيعها مثلاً ؟ أه .. مخدة واسيني .. خد بخاطري .. حاجة في الرينچ ده ولما تسرح بيها في المترو ممكن تقول للناس المخدة دي تطبطب على كتفك .. تقول لك صلي ع النبي .. كده يعني هتمشي هوا .. رابع اختراع بقى مناسب لأخوك قوي علشان حالته المادية مش ولابد أنبوبة معجون أسنان بغطا من الناحيتين ودي بقى لا هتفضل تعذبها معاك طول الشهر ولا تضغط عليها يمكن توافق تطلعلك كمان غسلة دي بمجرد ما تقرر تخلص هتخلص من غير فرهدة والله تبقى ريحت واستريحت خامس اختراع بقى اتقدم في معرض (ايفا برلين ٢٠٢٢ IFA Berlin) الناس دول كانوا حاسين بينا قوي يا جماعة وعارفين إن السوق تشبع بعربيات الكبدة فاخترعوا حتة لحمة مطبوعة بطابعة ثلاثية الأبعاد ومستحيل تفرق بينها وبين اللحمة البلدي بتاعتنا دي لا من حيث الشكل ولا اللون ولا الريحة ولا حتى الطعم أختها مش بنت عمها .. بكره الصبح .. هتلاقي عربيات مالية الدنيا وبيبيعوا النص بتلاتة جنيه .. الحقيقة .. العالم بيجري بسرعة قوي واحنا نفسنا انقطع .. أنا وأنا صغير كان الكومبيوتر نفسه بالنسبة لي إختراع .. كنا بنتعامل معاه في المدارس على إنه الأوضة اللي ما ينفعش تفتحها وإلا هتحل عليك اللعنة أنا خايف ..